For å kunne samarbeide betre med barn, unge og deira føresette – og med andre tenester, treng alle tilsette ein felles grunnleggande kompetanse.
Kompetansehevinga er eit leiaransvar og gjennomførast både i den enkelte teneste, og på tverrfaglege møtearena for tenester som jobbar med barn og unge.
Under finn du verktøy, ressursar og opplæringsmateriell som ein kan bruke i arbeidet med kompetanseutvikling i eiga teneste, og til opplæring av nytilsette.
I Sunnfjord kommune er dei ei målsetting at alle tilsette som jobbar med barn og unge har kunnskap om:
Sunnfjord kommune skal vere ei trygg og god kommune å vekse opp i. Alle barn og unge skal trivast, oppleve god læring, utvikling og meistring. Førebygging, tidleg innsats og tverrfagleg samhandling er då viktig og avgjerande for at vi skal yte gode tenester.
Gjennom den nasjonale samhandlingsmodellen Betre tverrfagleg innsats (BTI) har kommunen etablert eit rammeverk som sikrar ein felles struktur for alle tilsette som jobbar med gravide, barn, unge og føresette.
I juni 2024 vedtok kommunen ein førebyggande plan for barn og unge (2024–2030) som legg grunnlaget for våre prioriteringar og tiltak. Den digitale samhandlingsmodellen fungerar som eit levande verktøy i dette arbeidet, og vil bli oppdatert i tråd med teneste- og samfunnsutvikling.
Samhandlingsmodellen er grunnmuren for det heilskaplege arbeidet rundt barn og unge. Den viser korleis heile kommunen, på tre nivå, jobbar for å sikre at barn og unge i Sunnfjord får rett hjelp til rett tid.
For at alle barn og unge skal få den oppfølginga og hjelpa dei treng i eit tett samarbeid mellom familien og kommunen, jobbar tilsette i Sunnfjord kommune etter BTI-rettleiaren.
BTI rettleiaren beskriv korleis du skal gå fram for å avklare om det du undrar deg over er grunn til uro, og korleis du legg til rette for eit godt samarbeid med barnet/ungdomen og føresette – og eventuelt med andre fagpersonar. Rettleiaren gir tilsette nødvendig informasjon, verktøy og støtte for å sikre rett framgangsmåte i situasjonen dei står i, både innanfor den enkelte tenesta og på tvers av tenester.
Når ein tilsett oppdagar eit barn eller ein ungdom som treng hjelp og/eller støtte, startar arbeidet på lågast mogleg bistandsnivå (BTI nivå 0).
BTI skal sørge for at eventuelle hjelpebehov blir oppdaga og at riktige tiltak vert sett i verk så tidleg som mogleg (BTI nivå 1). Barnets beste skal alltid vere i fokus.
Har barnet/ungdommen behov for hjelp frå fleire tenester, skal tenestene jobbe saman og tilby heilskapleg innsats (BTI nivå 2 og 3).
Det er grunnleggjande viktig at barn, unge og føresette blir involvert på eit tidleg tidspunkt. Ved all oppfølging er medverknad og samarbeid med barnet/ungdommen og føresette ein viktig føresetnad for å få til gode løysingar. Unntaket er ved mistanke om vald eller seksuelle overgrep. Då skal barnevernet og/eller politi kontaktast direkte.
Forskning viser at manglande kunnskap om andre tenester og manglande anerkjenning av andre profesjonar sin fagkompetanse ofte hindrar godt tverrfagleg samarbeid. Difor er det viktig at du som fagperson set det godt inn i kva tilbod som finst i kommunen, og kva dei ulike tenestene har ansvar for.
Sunnfjord kommune har utarbeidd ei digital tiltaksoversikt, lett tilgjengeleg for både innbyggjarar og tilsette. For tilsette er den eit nyttig verktøy for å finne råd, rettleiing og samarbeid med rette tenester i kvar enkelt sak.
Vi som jobbar med barn og unge har eit ansvar for å sjå etter kjenneteikn på at barn og unge har det bra, og fange opp teikn og signal når noko forstyrrar barnets grunnleggande tryggleik og utvikling.
BTI-rettleiaren, nivå 0, beskriv korleis du skal gå fram for å avklare om det du undrar deg over er ei grunn til uro som krev handling.
Les meir om: Kva kan uro rundt barn, ungdom eller familiar vere?
Forsking har avdekka at mange kvir seg for å ta opp ei undring eller uro direkte med den det gjeld.
Skal vi finne ut korleis vi best kan hjelpe, må vi snakke med dei det gjeld og finne ut kva problemet eller utfordringa eigentleg er. Dette er noko vi må øve oss på og bli gode på saman.
Nedanfor er det lenka til fire kvalitetssikra nettressursar for gode samtalar med barn, unge og vaksne om det som er vanskeleg. Gjer deg kjent og vel den som passar best for ditt føremål.
Undervisningsfilmar retta mot tilsette i barnehage, skular og hjelpetenester (Korus)
Gjennom korte filmar får du gode tips om korleis legge grunnlaget for og gjennomføre spontante og planlagte samtalar med barn.
– Videoundervisning: Samtalar med barn
Opplæringsprogram og samtaleverktøyet «Snakke med barn» (RVTS)
Her kan du øve deg på å snakke med barn og unge ved mistanke om vald og overgrep, men også å gjennomføre samtalar om andre utfordrande tema med barn.
– www.snakkemedbarn.no
Den nødvendige samtalen (Korus)
Dette er ein guide til ein planlagt og godt førebudd samtale mellom profesjonelle og føresette. Den tek utgangspunkt i ei uro for eit barn, basert på konkrete og systematiske observasjonar av barnet.
– Film frå Korus om den nødvendige samtalen
Dialogmodellen (UiA)
Dette dialogverktøyet skal hjelpe tilsette i barnehagar og skular å snakke om mobbing.
– www.dialogmodellen.no
Offentlege instansar og andre tenesteytarar skal samhandle dersom samarbeid er nødvendig for å gje barnet eit heilskapleg og samordna tenestetilbod.
Gjennom tverrfagleg samhandling får tenestene betre og gjensidig forståing for kvarandre sine oppgåver. Tenestene blir også betre på å koordinere innsats og ansvar, slik at oppfølginga blir meir heilskapleg og samanhengande.
BTI (nivå 2 og 3) er både ein struktur og ei rutine for samarbeid og samordning av tenester rundt barn og unge i Sunnfjord kommune.
Strukturar og rutiner er nødvendig for å legge til rette for godt samarbeid i enkeltsaker. Rutiner med verkeområde på tvers av sektorar og verksemder kan bidra til felles forståing og praksis om felles ansvar. Leiarar har eit særleg hovedansvar for å sikre rutiner som bidreg til godt samarbeid og samordning.
Barnets beste skal vere eit grunnleggande omsyn ved alle avgjersle og handlingar som vedkjem barn.
Målet med å vurdere barnets beste er å sikre at behova og interessene til barn og unge blir tatt omsyn til i avgjersle som påverkar dei. Å lytte til kva barnet sjølv meiner, er viktig for å kunne bestemme kva som er til barnets beste. Ei grundig vurdering vil føre til betre avgjersle og bidra til å verkeleggjere barns rettar.
Ved deling av informasjon og tverrfagleg samarbeid skal det hentast inn samtykke frå den det gjeld.
Ei samtykkeerklæring er eit viktig og nyttig verktøy for å kunne jobbe tverrfagleg og gje best mogleg oppfølging. Her kan du lese meir om teieplikt, samtykke og anonyme drøftingar.
Sunnfjord kommune har utarbeidd eit samtykkeskjema for tverrfagleg samhandling som kan nyttast av kommunale tenester når det er behov for deling av informasjon og tverrfagleg samarbeid.
Gjer deg kjent med nasjonal rettleiar: Teieplikt, opplysningsrett og opplysningsplikt i forvaltninga, ein rettleiar (ny 2023, Justis- og beredskapsdepartementet).
I 2022 holdt Statsforvaltaren i Agder webinar om teieplikt og meldeplikt som vi anbefalar å sjå. Webinaret har bokmerke for ulike tema som du kan klikke deg inn på dersom du åpnar opptaket i youtube.
Førebygging av vald, overgrep og mobbing er viktig. Ved å gje barn kunnskap og eit språk, og styrke vaksne rundt til å sjå og følgje opp dei bekymringane dei kan ha knytt til barn og ungdom, er eit godt steg på vegen til å hjelpe.
Forsking viser at opplæring om mobbing, vald og overgrep kan ha ein førebyggande effekt og gje barn auka kunnskap, betre ferdigheiter og evne til å beskytte seg sjølv. Forskinga finn ikkje skadeverknadar av opplæring om vald og overgrep (Folkehelseinstituttet).
Barn og ungdom treng trygge vaksne som både kan formidle kunnskap om og snakke om vald, seksuelle overgrep og mobbing. Jegvet.no er ein gratis læringsressurs for barnehagar og skular om vald, overgrep, mobbing og barns rettar. Innhaldet er knytt til rammeplan for barnehagen og læreplanen for skulen.
RVTS har utvikla snakkemedbarn.no, ein gratis snakkesimulator der du kan trene deg på samtalar med barn og ungdom om vald, seksuelle overgrep og andre sensitive tema. Målet er å gje hjelparane konkret handlingskompetanse gjennom å øve på samtale. På snakkemedbarn.no finn du også nyttige tips til samtalen og kan lese om kva konsekvensar vald, overgrep og barndomsbelastningar kan få for barn og ungdom.
Snakkemedbarn.no og Jegvet.no er verktøy som med fordel kan nyttast saman. Der snakkemedbarn.no har fokus på tryggleik og kompetanse til den vaksne, har JegVet.no fokus på å gje barn og unge kunnskap om kropp og grenser, vald og overgrep, følelsar og vennskap.